Lente: ‘n Seisoen van Nuwe Hoop
Met die aanbreek van September verwelkom ons nie net die lente nie, maar ook ‘n seisoen van nuwe hoop, nuwe drome en nuwe geleenthede.
Lente herinner ons daaraan dat geen winter vir ewig duur nie. Ná maande van koue en kaal takke bring God weer lewe, kleur en groei. Hierdie pragtige verandering in die natuur weerspieël ook die reis van baie van die kinders in ons DPS Huise.
Wanneer kinders by ons aankom, dra hulle dikwels swaar stories, onsekerheid en seer saam. Maar deur die liefde van toegewyde pleegmoeders, die ondersteuning van maatskaplike werkers, kerkgemeentes en ander rolspelers, begin daar stadig maar seker weer iets nuuts groei. Vertroue word opgebou. Selfvertroue ontwikkel. Drome begin vorm aanneem. Hoop kry weer ‘n plek in hul harte.
Soos ‘n klein saadjie tyd, sorg en geduld nodig het om te ontkiem, het elke kind ook veilige verhoudings, aanvaarding en liefde nodig om sy of haar volle potensiaal te bereik. Elke bemoedigende woord, elke drukkie, elke gebed en elke daad van omgee is soos water op daardie saadjie van hoop.
By DPS Huise is ons bevoorreg om hierdie wonderwerk van groei elke dag te beleef. Ons sien kinders wat weer glimlag, wat nuwe vaardighede ontwikkel, wat leer om te vertrou en wat begin glo dat hulle toekoms vol moontlikhede is.
Terwyl ons hierdie lenteseisoen vier, wil ons opreg dankie sê aan elke pleegmoeder, maatskaplike werker, gemeente, donateur, ondersteuner en vrywilliger wat saam met ons hierdie reis stap. Julle maak dit moontlik dat hoop elke dag nuwe wortels skiet.
Mag hierdie lente ons almal herinner aan die belofte van Jesaja 43:19:
“Kyk, Ek gaan iets nuuts doen; dit staan al op die punt om te gebeur, julle kan dit al sien kom.”
Mag ons saam aanhou om saad van liefde, geloof en hoop te saai, sodat elke kind die geleentheid kry om te blom en die mooi toekoms te ontdek wat God vir hulle beplan het.
DPS Groete
Maatskaplike Bestuurder: DPS Huise